Mamá quero ser artista! (II)

Un ano máis, damos por finalizado un curso cheo de risos, aprendizaxe e amizade. Para celebralo, queremos compartir con vós o traballo realizado durante estes meses. Será unha festa exposición que terá lugar o 23 de xuño ás 19h en Aire centro de Arte.

Nesta exposición veredes obras de artistas que van desde os 4 anos aos 80. Forman parte dos grupos de Pequeartistas, Arte e Idioma (inglés e francés) e Idea, concepto e proceso da creación, que cada día nos sorprenden coas súas creacións. Estamos convencidas de que a vós tamén vos sorprenderedes. A sala de exposicións, a escaleira e o espazo #casamorada encheranse de creatividade e experiencias compartidas.

Ademais presentaremos o fanzine Mamá quero ser escritora (II), que recolle o traballo feito polas alumnas dos Almorzos Creativos e que reflexionará sobre quen somos e como estamos no mundo desde a nosa perspectiva como mulleres.

Queremos destacar o traballo transversal que se fai desde cada un dos grupos. Todos aprenderon as técnicas das artistas que pasaron polo centro: o collage e a inspiración musical de Maite Ortega, os retratos e as persoas a través de Melania Freire ou Reme Remedios, a intimidade xunto a Bibi Martín, a improvisación a partir do xesto de Belkiss Oliveira… só por nomear a algunhas, pero a lista é tan extensa como numerosas son as pezas e textos que se levan feito en dez meses.

Nós estamos orgullosas do noso alumnado, por iso agardamos que tanto toda a familia de Aire, como as persoas que aínda non nos coñecedes compartades este día con nós! Vémonos!

Por favor seguenos e comparte:

Taller de moldes, con Roi Domínguez

Achegámonos ao final de curso da man do artista ourensán Roi Domínguez. Especialista en escultura, preséntanos un obradoiro de moldes que terá lugar os días 10 e 11 de xuño. O horario será de mañá, de 10h a 14h. Está dirixido a un público adulto, a partir de 12 anos.

No obradoiro, quen perticipe construirá as súas propias pezas a partir de moldes feitos de escaiola e silicona. A xente que veña pode ser tanto persoas interesadas na escultura, sen coñecementos previos, como aquelas artistas que queiras reciclarse ou aprender novas técnicas.

O prezo do obradoiro será de 60€/material incluído.

As prazas son limitadas, polo que se prega a reserva en airecentrodearte@gmail.com ou no 981 589 059.

Agardámosvos!

Por favor seguenos e comparte:

Anécdotas legais varias (I)

A orixe do dereito de participación
en re-venta de orixinais plásticos

A nosa especialista en dereito legal dx artista, Visi López del Riego, ademais dos Briconsellos Legais, déixanos unha serie de anécdotas para que descubrades o que hai detrás das lexislacións culturais.

Comezamos con: A orixe do dereito de participación en re-venta de orixinais plásticos.

A finais do século XIX, París congregaba a un gran número de artistas bohemios e románticos que pelexaban coa feroz especulación existente no mercado da arte.

Nese mundo dos óleos e os faiados, zumegaba tanta miseria que a prensa da época acabou transformando en tinta os discursos indignados iniciados polos artistas en cafés e reunións. Conseguiuse así unha especie de simpatía popular cara a esa xente creadora que vivía famenta e explotada.

Resultado daquel rebumbio, naceu o droite de suite na Lei Francesa de 20 de maio de 1920 como un dereito de cobro dx artista plástics. Esta consistía nunha porcentaxe sobre o incremento do valor dunha obra no caso de re-venta.

Na actualidade, na nosa lexislación, o dereito de participación dxs artistas plásticxs evolucionou e recolleuse nunha lei concreta do ano 2008. As súas premisas principais son:

-o dereito propio dxs autorxs de obras orixinais gráficas ou plásticas consistente nunha porcentaxe sobre o prezo da reventa.

-a existencia dunha re-venta na que medien profesionais do mercado da arte (galerías de arte, marchantes, salas de venta…).

-que o prezo da transacción acade os 1.200 euros como mínimo (impostos excluídos).

Para outras dúbidas e curiosidades legais varias sobre os dereitos dxs artistas plásticxs:

Visi López del Riego

Aire centro de Arte

Caldeirería 50, 2º

981 589 059

TEXTO: Visi López del Riego

Por favor seguenos e comparte:

Verán creativo!

CAMPAMENTO DE VERÁN
EN AIRE CENTRO DE ARTE!!
  VIVCREATIVIDADE!!!
MATRÍCULA ABERTA!
 
Achégase o verán e Aire centro de Arte e Cornelia Craft únense para ofrecervos un Verán Creativo! Xa está aberta a matrícula!
No espazo compostelán de Aire centro de Arte, durante todo o mes de xullo e a primeira quincena de setembro, nun horario de 10h a 14h (tamén haberá a opción para as persoas máis madrugadoras de comezar ás 8h), as crianzas de entre 4 e 12 anos desenvolverán aspectos emocionais e de concienciación medio-ambiental a través da creatividade. Arte, música, teatro, escultura… convivirán para facer un verán único e ameno, no que se combinarán as actividades no interior e no exterior.
Así, dividiremos o verán creativo en dúas partes:
1Mes de xullo (do 3 ao 28, en Aire centro de Arte):
Cornelia Craft desprega as súas ferramentas para que a partir da arte, música e a concienciación medio-ambiental, as crianzas desenvolvan as emocións.
O corpo, a través do xogo, a música, o teatro e a literatura, amosaralles a relación das persoas co mundo.
O mes rematará cun concerto da Baby Band no que participarán as crianzas que veñan ao campamento. Terá lugar no Auditorio de Galicia, na sala Mozart. Será unha actividade aberta ao público, que tamén poderá ser parte dela.
2. Mes de setembro (do 4 ao 15, en Aire centro de Arte):
Collemos a quenda en Aire centro de Arte. A través do debuxo, a escultura, a arquitectura, a cianotipia… as crianzas desenvolverán a súa creatividade.
Poñeremos a atención no concepto do ser humano dentro do mundo, como ente que convive e intervén nel.
Remataremos esta parte cunha acción no parque da Música, no que as crianzas crearán unha instalación efémera. Ademais, haberá unha exposición en Aire centro de Arte na que se amosará o traballo realizado durante os dous meses. Serán actividades abertas e participativas a todo o público.
O prezo do campamento é de 85€ á semana, cun desconto do 10% a familias e amigos (non acumulativo). Dámos así a posibilidade de que as familias escollan o tempo que queren gozar das actividades.
A partir de hoxe, ABRIMOS MATRÍCULA! 
Reservade a vosa praza en: 
981 589 059

Cornelia Craft e a súa  Baby Band traballan a través do ocio ecolóxico. Son expertos no desenvolvemento creativo na infancia a partir da liberdade para crear e xerar representacións artísticas nadas da súa intención e do inesperado, dando os primeiros pasos cara a educación ambiental e musical.

Aire centro de Arte é un espazo no que se pretende xerar coñecemento emocional e sensorial a través das artes plásticas, escritura, idiomas… a través dunha perspectiva de xénero. Promove eventos culturais para outras entidades. Tamén funciona como sala de exposicións de arte contemporánea na que se combinan artistas recoñecidxs con novxs creadorxs.

Máis información: airecentrodearte@gmail.com // 981 589 059
Agardámosvos!
Por favor seguenos e comparte:

A miña vaidade, de Elena G. Dahlgren

Este mes de maio, a artista Elena G. Dahlgren sacará as cores das nosas vaidades. Será o 19 de maio, ás 20h, cando presente en sociedade A miña vaidade.

A miña vaidade é o tramo final do Fondo de armario. Trátase dun conxunto de miriñaques que se erguen como roupa nova feita de roupa sacada dos fondos de armario. Unha exposición solidaria na que tanto as prendas que conforman as pezas como o recadado irá destinado a unha ONG que escollerá Dahlgren.

Elena G. Dahlgren (Vigo, 1969), é licenciada é Belas Artes na especialidade de Escultura e en Ciencias da Información, en Publicidade e Relacións Públicas, pola Universidad Complutense de Madrid.

En 1996, a través dunha beca ERASMUS estuda o 4º Curso de Belas Artes na Hochschule der Künste de Berlín; en 1998 consegue a beca INTERCAMPUS de intercambio coa Escola de Belas Artes da Universidade Federal de Minas Gerais, Belo Horizonte (Brasil) e, de xaneiro de 1999 a decembro del 2000, vive na capital de México unindo unha beca da AECI para a Maestría en Semiótica na Universidad Anáhuac e o seu traballo como artista plástica. De 2002 a 2005 recibe unha beca da Xunta de Galicia para realizar a súa tese doutoral na Facultade de Belas Artes de Pontevedra.

Desde o 2005 é parte integrante do grupo de arte e acción 3Marías, con Andrea Costas Lago, Eva Martínez Villar e Patricia Valverde Esteiro.

As obras de Elena G. Dahlgren (instalacións, fotografías, collage, debuxos, esculturas…) parten da idea de que a arte é xogo e exhibición. Esa aparencia de xoguete serve como instrumento da arte e, a través do xogo, establécese a relación entre a arte e o público. Ocupando o espazo con series de obxectos, traballa o obxecto artístico non como algo único, senón que, ao ser repetido, é transformado en algo próximo, nun máis dunha serie: necesario pero prescindible, como as pezas dun xogo. E en todo xogo precísase de alguén que xogue. A arte sitúase no espazo do uso dx espectador/a, de xeito que consegue que unha simple cousa se converta en algo máis, engadíndolle o relato dunha experiencia.

Os seus últimos traballos afástanse do exclusivamente artístico e plantexan a idea de colaboración e interacción entre o seu universo creativo e outras disciplinas. Tras unha incursión no mundo da gastronomía coa ilustración de receitas e o deseño dunha vaixela para Xosé T. Canna, ou a cena compartida con Miguel Oliveira, comeza o proxecto Nosoyunplato, no que unha vaixela se transforma no soporte da súa obra: de novo a serie, a reprodución, o afastamento dos soportes univocamente artísticos. Introducirse no mundo de outros enriquecendo o propio.

A exposición estará ata o 19 de xuño.

Cómpre destacar, que a exposición vén acompañada de dous obradoiros intensivos impartidos pola propia artista: o 7 e o 21 de maio, no que quen participe (maiores de 12 anos) poderán construír o seu propio miriñaque e comprender o proceso creativo da autora.

Por favor seguenos e comparte: