Creatividade fotográfica, por Loly Villoch

Dentro das actividades de #casamorada, Loly Villoch imparte un obradoiro de creatividade fotográfica. Será o 17 de febreiro, de 17 a 20h, para un público adulto (a partir de 12 anos).

Como explica Loly “o taller busca facilitar que xs asistentes impulsen a súa creatividade para obter imaxes orixinais”. Para iso explicaranse diferentes estratexias creativa, como xerar ideas e desenvolver a imaxinación.

A clase desenvolverase en dúas partes. Na primeira, teórica, Villoch explicará o seu propio proceso creativo, referentes, técnicas e estratexias de xeración de ideas… a partir de exemplos reais realizados por ela. Na segunda, xs participantes crearán a súa propia escena en miniatura partindo de cero, desenvolvendo a planificación e o bosquexo ata a realización. Deste xeito poderán descubrir novas utilidades para os obxectos cotiáns.

O obradoiro está dirixido tanto a persoas interesadas na fotografía como aquelas que teñan afección pola ilustración e outras artes visuais.

Loly Villoch centra o seu traballo na fotografía de autor e na fotografía de viaxes. Formouse con fotógrafos como Fuco Reyes, Gabriel Tizón, Sofía Moro ou Alberto García-Alix. Participou en 8 exposicións colectivas e realiza unha viaxe fotográfica ao ano.

O prezo é de 25€/persoa con material incluído. O número de prazas é limitado a 12 persoas.

Reserva a túa praza en: 

airecentrodearte@gmail.com // 981 589 059

Por favor seguenos e comparte:

Iniciación á maxia, por Joshua Kenneth

O tarde do 11 de febreiro, Aire centro de Arte énchese de maxia. O ilusionista Joshua Kenneth impartirá un obradoiro para todas as persoas (a partir de 7 anos) interesadas en aprender maxia e ilusionismo.

De 17h a 19h, que participe non só desenvolverá a súa creatividade, senón que será máis hábil no uso das mans e gañará en autoestima e nas capacidades crítica e comunicativa,

O prezo do taller é de 15€/persoa co material máxico incluído que proporcionará o mago.

Joshua Kenneth participou en distintos espectáculos no Auditorio de Abanca, no Hostal dos Reyes Católicos, no Foster’s Hollywood, en La Tuerka 27… por nomear algunhas. Tamén apareceu en programas como Xente Emerxente (VTelevisión), Onde vai a xente (TVG) ou El arte de lo imposible (crónica de RTVE) entre outros. Pero como na maxia vale máis a imaxe… Aquí tedes un vídeo onde Kenneth entra en acción.

Reserva a túa praza en: 

airecentrodearte@gmail.com // 981 589 059

Por favor seguenos e comparte:

Metauniversos cotiáns, de Loly Villoch

Volvemos a #casamorada da man de Loly Villoch. O vindeiro 3 de febreiro, ás 20h, o micromuseo de xénero de Aire centro de Arte acollerá unha mostra fotográfica que xira ao redor do rol que desenvolve a muller e a necesidade de rachar con el.

En cada imaxe, Villoch combina o fogar, o cotián, co mundo onírico que se crea na cabeza da protagonista de esta historia. Como explica a propia fotógrafa “ese xogo entre os espazos macro e micro revélase como unha alegoría das relacións desiguais entre homes e mulleres que se repiten sen importar o lugar no que nos atopemos”.

A exposición estará ata o 3 de marzo.

Ademais, Loly Villoch, impartirá un taller sobre creatividade fotográfica, o vindeiro 17 de febreiro (de 17h a 20h), para adultos a partir de 12 anos. Os participantes aprenderán a obter imaxes orixinais a través de distintas estratexias creativas para ser quen de extraer todas as posibilidades ao cotián.

Podedes ver máis fotografías de Loly Villoch na súa páxina de Facebook.

 

 

 

 

 

Por favor seguenos e comparte:

No soundpainting non existen os erros

Texto: Alba Lojo

O soundpainter Ricardo Gassent
Foto: Nacho Mascuñán

Con esta rotunda afirmación daba comezo o sábado, 21 de xaneiro, o taller intensivo de soundpainting impartido por Ricardo Gassent no Auditorio de Galicia.

Durante a xornada, o vínculo existente entre a capital galega e o soundpainting tomou novos impulsos. Poñéndonos en antecedentes, Santiago de Compostela foi o primeiro lugar en coñecer esta linguaxe nos anos noventa trala visita de Walter Thompson, creador do soundpainting. Desde aquí foi exportada a numerosos lugares, polo que non resulta allea a predisposición e entusiasmo dos artistas galegos por esta disciplina. Así se demostrou durante o obradoiro, posto que desde o primeiro momento foi palpable a conexión entre os participantes e o soundpainter Ricardo Gassent.

A xornada deu comezo cunha breve presentación dos participantes, coa intención de agrupalos segundo as súas modalidades artísticas principais: os músicos á esquerda do soundpainter, seguidos polos cantantes, actores e os artistas visuais cerrando o semicírculo que atendía a maxistral clase de Gassent. Como a meirande parte dos asistentes eran artistas multidisciplinais foi posible probar o soundpainting desde diferentes perspectivas.

Signo TODOS
Foto: Nacho Mascuñán.

A clave do soundpainting reside na comprensión dos signos que conforman a linguaxe coa intención de integrar aos artistas, músicos, cantantes, actores… nun só conxunto. O encargado de guialos a través dos signos é o soundpainter. Xa que logo, é necesaria a comunicación xestual recíproca entre os artistas e o compositor. Dada a amplitude e complexidade dos máis de 1200 xestos que integran esta linguaxe, semellaba case imposible que un taller intensivo tivese uns resultados tan rápidos, que se acadaron sen problema.

Ao longo da mañá, Ricardo Gassent foi presentando os signos básicos necesarios para a composición multidisciplinar. O soundpainting ten recollida a súa propia sintaxe baixo o parámetro “quen, que, como e cando”. A importancia recae en observar as directrices que marca o soundpainter e ser quen de interpretalas por un mesmo. Tal como explicaba Gassent “non se trata de copiar o movemento do resto do equipo, se non de observar e responder en consecuencia. Non existen os erros, polo que non pasa absolutamente nada se un artista non responde nun determinado momento. É improvisación, é soundpainting”.

Guiando a actores.
Foto: Nacho Mascuñán.

A integración dos participantes co compositor axiña empezou a dar resultados. Logo dun curto período de aprendizaxe para a comprensión dalgúns xestos, Gassent deu renda solta á disciplina empezando a crear pequenas composicións que tomaban forma nos participantes. Así, destacou por un lado a capacidade adaptativa dos participantes xunto coa experiencia de Gassent, quen coñeceu o soundpainting da man do propio Walter Thompson.

A sala de exposicións do Auditorio de Galicia parecía integrarse dentro da propia linguaxe, favorecendo a interacción entre os diferentes artistas e conectándose coa mostra alí exposta.

Tras un breve descanso para repoñer forzas, o grupo mergullouse no traballo de Gassent a través dunha breve presentación na que o soundpainter fixo un repaso pola historia da disciplina, así coma a repercusión do soundpainting en España, mencionando o caso do soundpainter Óscar Vidal, o soundpainter máis antigo de España, ou a recentemente desaparecida Orquestra de Soundpainting de Barcelona. Durante a proxección, Gassent incidiu na frase coa que comezabamos esta crónica, exemplificada co Esemble BIT20, da que forman parte compoñentes da Orquestra Filarmónica de Bergen: “neste caso, a parte máis complexa residiu en facer entender que no soundpainting nada está fora de lugar, non existen os erros. O cal resulta complicado de asimilar cando se trata de músicos acostumados a seguir as sinais do compositor. Introducir a improvisación resulta unha ardua tarefa nalgúns ámbitos”, sinalaba Gassent.

Seguindo esta liña, Gassent explicou que non é necesario ser compositor para desempeñar o papel de soundpainter, se non que hai numerosos casos de compositores procedentes de outras disciplinas, como Andrea Ariel, bailarina estadounidense que leva anos traballando como soundpainter.

Ademais, o soundpainting é unha linguaxe que se pode adaptar a numerosos escenarios, como fai Óscar Vidal que non ten un grupo e malia iso utiliza a técnica cos seus alumnos de secundaria, xa que é profesor de instituto en Valencia.

Deste xeito, Gassent buscaba que os participantes se introducisen no soundpainting non só a nivel técnico coma disciplina artística, se non coma unha ferramenta que sirve para integrar a persoas dentro dun mesmo conxunto.

Traballo en grupo
Foto: Nacho Mascuñán

Ao longo da tarde, o grupo desenvolveu diferentes estilos da linguaxe, coma o puntillismo ou o minimalismo, e tiveron cabida outro tipo de xestos, como as performances individuais ou a pintura.

Antes de dar por finalizada a xornada, Gassent animou aos participantes a un intercambio de roles, tomando o posto de soundpainter. Os que decidiron intentalo, demostraron que o taller intensivo impartido por Ricardo Gassent tivo amplos resultados, tanto na composición da escena como na interpretación da linguaxe.

A modo de despedida, Ricardo Gassent animou aos participantes a continuar a formación nesta disciplina a través do material existente en Internet. En canto aos participantes, grazas á boa sintonía do grupo xunto co positivo desenvolvemento do taller, mostráronse máis que satisfeitos coa súa participación.

“O obxectivo está cumprido, posto que o máis relevante é o feito de dar a coñecer o soundpainting”, foi a conclusión de Ricardo Gassent tras o taller.

Despois da gran acollida desta xornada intensiva de soundpainting, a colaboración entre Soundpaintingmadrid e Aire centro de Arte continuará a argallar máis cousiñas sobre soundpainting. Damos por inaugurados os Seminarios de Soundpainting en Galicia. Estade atentxs!

Por favor seguenos e comparte:

Invención. Cartilla de familia. Taller de fotocomposición

O vindeiro 28 de xaneiro, de 10h a 14h e de 16h a 20h, Melania Freire impartirá o obradoiro  de fotocomposición “Invención. Cartilla de familia“. O taller está dirixido a un público adulto, a partir de 12 anos.
A partir da exposición Inventario, xs participantes reinterpretarán o álbum familiar a través de fotografías orixinais, feitas no momento e ilustracións.
De aí a necesidade de que xs participantes traian ou ben a súa propia cámara de fotos ou o teléfono para poder sacalas, pois parte do taller consistirá en sacar fotos a situacións, obxectos… que lembren a historia familiar de cadaquén. As fotografías imprimiranse en Aire centro de Arte para que poidan ser intervenidas durante o obradoiro.  Ademais deberán traer os seus propios albumes e fotos familiares.
A partir de todos estes elementos construírase un novo álbum familiar como o da propia artista ou seguindo o exemplo de outros fotolibros de diferentes creadores.
O prezo é de 45€ con material incluído.
Reserva a túa praza en:
airecentrodearte@gmail.com
981 589 059
Por favor seguenos e comparte: